TACLOBAN CITY – Gin aaghat han Tacloban City Youth Development Office an mga kabatan-onan nga nag eedad 15-30 years old nga mag pa rehistro ha National Youth Commission ngan makiusa ha City Youth Development Council ha paghahatag hin maupay nga panuyuan ha kumunidad.
Kun an usa nga youth in rehistrado na ha National Youth Commission in opisyal ini nga magiging kaparte han City Youth Development Council nga gin papangunahan han Sangguniang Kabataan Federation President.
Sumala kan Tacloban City Youth Development Office Over all Youth Coordinator, Jefferson Pabunan, an kaupayan han pagiging kaapi han nasabi nga programa in mas magiging abre an purtahan han mga kabatan-onan ha pag bulig ha kumunidad sugad man an pakikig binuligay ha kada tagsa.
Dugang pa hini, gin tatalinguha gihapon han ira opisina nga mahimo kumo usa nga ordinansa an City Youth Development Council ha syudad han Tacloban agud matagan hin kadugangan nga budget an organisasyon.
Ha lain nga bahin, gin malatumat pa ni Pabunan nga usa ha mga pitad nga gin bubuhat han mao nga opisina an Sangguniang Kabataan Youth Monitoring kun diin, gin bibisita han mga ini an mga youths ha 137 nga barangay han syudad agud panginanuon kun gin bubuhat ba hin sakto han Sangguniang Kabataan Officials an ira tungkulin ug gin iimplementar ba han mga ini an mga program projects activities para ha mga youths. (via Bombo Niña Magpili)
