TACLOBAN CITY – Nakatalaan na nga sunugon an mga ilegal nga droga nga nakumpiskar ngan ginturn over han mga kapulisan ha Philippine Drug Enforcement Agency (PDEA) Regional Office 8 Laboratory.
Sumala kan PDEA 8 Regional Director Edgar Jubay, igpapailarom ha thermal decomposition an usa nga unsealed plastic bag hin marijuana nga may kabug-aton nga 156.78 grams, tulo nga tape sealed rectangular bricks hin gintutuuhan nga shabu nga may kabug-aton nga 3082 grams, usa pa ka-plastic bag hin marijuana leaves 236 grams, 22 nga pakete hin 23.50 grams marijuana leaves ngan usa nga plastic jug nga may sulod nga colorless liquid.
Dugang pa hini nga gintitirok ngatanan nga mga drug evidences nga nakukumpiskar ha bug-os nga nasud ngan gindadara liwat ini ha national office han PDEA para han pagsunog hini.
Nahibaruan nga ginsertipikahan han PNP an mao nga mga drug evidences nga waray kaso nga ginpasaka ngan ha pagkayana in nagpapabilin ini ha kustodiya han PDEA 8.
