TACLOBAN CITY – Nagkaurusa an mga Electric Cooperatives han Eastern Visayas agud maghatag hin bulig nga mapadali an pagbalik han supply hiton kuryente ha probinsya han Catanduanes, nga duro nga naapektaran han paglasurbo ni Super Typhoon Pepito.
Suma-total ha 86 nga line workers tikang ha 11 nga mga electric cooperatives tikang han bug-os nga Region 8 sugad han Dorelco, Leyeco II, Leyeco III, Leyeco IV, Leyeco V, Southern Leyte Electric Cooperative, Biliran Electric Cooperative, Northern Samar Electric Cooperative, Samar Electric Cooperative (Samelco) I, Samelco II, ngan Eastern Samar Electric Cooperative an ipapadara ha Catanduanes kun diin 43 in tikang ha Cebuano-speaking area hiton Southern ngan Western part hiton Leyte, ngan 43 naman liwat in Waray Waray-speaking tikang ha Leyte ngan Samar province.
Labot la han mga linemen in nagdara gihapon an mga electric cooperatives hin relief goods sugad hiton delata, bugas, noodles ngan clean water, nga igpapanhatag han mga apektado nga pamilya ha lugar.
Samtang, sumala naman han LEYECO III General Manager, Allan Laniba, nga han hi kita daw an naapektaran han Super Typhoon Yolanda in nagpaangbit liwat hin bulig an pipira nga mga electric cooperatives ha iba nga rehiyon, sanglit yana in aton naman pagbalos ha mga nanginginahanglan.
