TACLOBAN CITY – Apektado yana an pira nga mga biyahe pakadto ha Samar ngan pakanhi ha Leyte, matungod han ginpatuman nga public advisory hiton Department of Public Works and Highways o DPHW Region 8, kun diin ginpapagbawalan nga umagi adton magbug-at nga truck, ngan pira nga mga pampasaheros nga sarakyan ha San Juanico Bridge.
Una hine nagpagawas hin pahimatngon an buhatan hiton DPWH-8, nga kinahanglan dire malahos ha 3 metric tons iton kabug-at han mga sarakyan nga maagi ha nasabi nga tulay, agud nga maprotiheran an kapasidad ngan kadig-on hine.
Sumala kan Department of Public Works and Highways Region 8, Regional Director, Engr. Edgar Tabacon, nga may nakit-an hira nga guba ha nasabi nga tulay, subay na gihapon ine ha gindumara nga assessment.
Ha mao nga aberya, apektado dinhe an mga produkto nga tikang ha Mindanao, Manila, ngan magin ha Samar areas, kun diin naka-standby an mga ine ha intrada hiton tulay.
Labot la ha mga kargamento, apektado gihapon adton mga pasaheros, pakadto ha Samar.
Nakikipagkoordinar na an DPWH-8, ha mga sarakyan nga naglahos hiton 3 metric tons pinaagi hiton Philippine Ports Authority o PPA.
Ginbabana-bana naman nga maabot hin P800M an posible magamit nga salapo agud nga igbalik an kadig-on hiton nasabi nga tulay.
Ha pagkayana, waray pa ginpagawas na detalye an DPWH-8 kun sano mahuhuman an paghingayad han nasabi nga tulay, pero nanawagan naman ine hin koordinasyon ha mga commuters ngan drivers nga makipagkoordinar ha ira ginpapatuman nga mga aludayday agud nga magin hapsay an dalagan han trapiko ha mao nga tulay.
