TACLOBAN CITY – Mas magtitikadako an Eastern Visayas Medical Center (EMVC) mahitungod han pagtitindog han Legacy Building ngan Specialty Center Building yana nga tuig nga makakapaghatag naman hin kadungan ngan dekalidad nga serbisyo panlawas ha Sinirangan Bisayas.
Sumala kan EVMC Chief Dr. John Michael Jaro nga an nasabi nga expansion in magreresulta hin mas pagigin maupay pa han ospital.
“We envision that EVMC will have a bed capacity of 1,500, potentially increasing up to 1,800 beds to accommodate more patients from across the region,” yakan niya.
An mao nga Legacy Hospital ngan Specialty Center in pagtutukuron ha atubangan mismo han main building han ospital nga gin ookuparan naman han pira nga mga magtirinda.
Kalakip han magigin features han Legacy Hospital in an 13-storey building nga 28,780sqm. an kahaluag, mayda full capacity hospital nga mayda naman 150 private beds ngan 200 ward beds, 600 nga mga lingkuran nga para naman ha out patient laboratory ngan Out patient department, ngan full capacity nga operating room theaters.
An Specialty Center Building naman in mayda 7-storey nga mayda naman kahaluag nga 12,400sqm., 250 ward beds, nga kun diin in para ini ha mga transplantation, bypass operation ngan iba pa nga nagkikinahanglan hin specific procedure ngan management.
Ginbabana-bana nga aada ha P5 billion an budget han proyekto, nga mayda naman kadugangan nga P2 billion ha 2025 ngan dugang pa liwat nga P2 billion nga mapapagawas ha 2026.
Ginlalauman naman nga magtitikang an konstruksyon han Legacy Building sunod nga tuig mahuman itun pagbubuhaton nga clearing operation ha lote nga panag-iyahan naman han ospital nga gin ookuparan naman ha pagkayana han mga vendors.
Mayda gihapon ini covered crossway nga magkokonektar han main hospital facitility nga magsisigurado naman han madagmit nga access para han mga pasyente, ngan iba pa nga diri na pagkikinahanglangon nga tumabok ha highway.
“We need to start constructing this building because it will greatly benefit the region’s healthcare,” pagduon pa ni Jaro.
