TACLOBAN CITY- Ginkakalipay nga igpahibaro han Public Employment Service Office (PESO) nga nagin malinampuson an gindumara nga Mayor’s Employment Generation Activity (MEGA) Job Fair, kakulop nga adlaw ha Tacloban City Convention Center/Astrodome.
Sumala kan Public Employment Service Office (PESO) Manager Ruena Mate, maabot ha 937 nga mga aplikante an ira na-akomodar ngan 70 dinhe an na hired on the spot, samtang 159 naman an near hired nga mga aplikante.
Dugang pa hine maabot naman ha 35 nga mga local employers an nagpartisipar han nasabi nga Job Fair, kun diin 700 naman an mga nagin abelable nga posisyon para ha mga lokal nga panrabahuan, samtang ada naman ha 4 nga overseas agencies an naki-usa ha nasabi nga Job Fair, kun diin mayda ine 1, 170 nga mga job orders an ginpagawas nga pwede aplayan han mga job seekers.
Manunumduman nga an MEGA Job Fair in gindudumara duha kabeses ha usa katuig ha Tacloban, agud nga padayon makaghatag hin oputunindad ha mga namimiling hiton trabaho ha bug-os nga rehiyon.
Mababaruan nga presente naman an mga partner agencies sugad hiton Philhealth, Pag-IBIG, DOLE, TESDA-Leyte, OWWA, NBI-EVRO, SSS Tacloban, PRC Tacloban, DMW, NMP, ngan EVSU.
