TACLOBAN CITY– Dead on arrival an usa nga MCH driver, mahuman ine nga pusilon han mga dire pa makilala nga mga suspek ha Brgy. San Victor, Tanauan Leyte.
Ginkilala an biktima kan Gil Advincula Saballe Jr., 65 anyos nga residente han Brgy. Malbog Tolosa Leyte.
Sumala kan Tanauan Municipal Police Station, Officer in Charge, PCpt. Faith Yane Aseo, tikang an biktima ha Tabon-Tabon ngan ine in mayda karga nga upa,kun diin tipauli na ine ha Tolosa.
Subay ha ira imbestigasyon, an mga suspek in nakasunod na ngayan ha biktima, ngan nagbiling ine hin higayon kun diin ha pagliko ha may junction pakadto Tolosa Leyte, nag over-take an mga suspek ngan didto na ine ginpamumusil, ine naman in subay ha ira nakuha ha CCTV nga nakabutang ha may junction.
Nakag-angkon an biktima hin 2 nga igo ha iya taludtod, ngan 1 naman harani ha iya may talinga, nga nagin resulta naman han iya dayon nga kamatayon.
Ha pagkayana, nagpapadayon an imbistigasyon han mga kapulisan ha mao nga panhitabo agud nga matudlok an mga suspetsado.
