NATIONAL NEWS- Ginkokonsidera ni Makati City Mayor Nancy Binay nga an akusasyon kontra ha iya nga nakarawat hiya hin salapi tikang ha flood control projects in usa nga pamaagi agud nga iglikay an tinuod nga nagpapaluyo han anomalya.
Ine an nagin reaksyon han anay Senador nga yana in alkalde mahuman nga mahingaranan hiya ni anay Department of Public Works and Highways (DPWH) undersecretary Roberto Bernardo nga nakarawat hin kickbacks.
Labot la kan Binay in kalakip gihapon hira Senator Chiz Escudero, Ako Bicol partylist Representative Zaldy Co ngan anay Senador Bong Revilla.
Sumala kan Binay nahikalasan hiya ngan iya ginkakasubo matungod nga gindamay hiya ha anomalya han DPWH kun diin waray ine kamatuoran.
Gindig-unan gihapon hine, nga mamingaw la hiya nga nagtratrabaho kumo alkalde han Makati ngan nakakasubo la matungod nga gingagamit hiya para makalikay adton mga indibidwal nga tinuod nga nagpapaluyo han nasabi nga himangrawon.
Ginkahambog pa hine nga an iya paghahatag hin serbisyo ha publiko in dire matutupngan ngan waray kalakip nga anomalya.
