Nanindugan hi Baguio City Mayor Benjamin Magalong nga mas “credible” an ginbuhat nga imbestigasyon han Senado kasumpay ha mga maanumalya nga flood control projects kumpara ha imbestigasyon han Kamara.
Ginbuhat han alkalde an pahayag ha usa nga forum kun diin ginmalatumat hini nga basar ha iya mga eksperyensiya, nakikita niya nga mas maupay an proseso han Senado.
Bisan man kun nahingaranan an mga ngaran nira Sen. Jinggoy Estrada ngan Sen. Joel Villanueva nga presente nga iginsusumpay ha kontrobersiya, ginpahayag ni Magalong an iya padayon nga pagtapud ha Senado, labi na nga hi Sen. Panfilo Lacson na an nagmamangulo ha Blue Ribbon Committee nga presente nga nag i-imbestigar ha korapsyon ha flood control.
Samtang, ginklaro naman han alkalde nga maaram hiya han posible pagkakadabi han pira nga mga kongresista ha mga maanomalya nga proyekto, pero gintagan-duon hini nga dire naman tanan nga kongresista in dabi ha korapsyon.
