TACLOBAN CITY – Nanawagan an iton mayor han bungto hiton Matuguinao kan Presidente Rodrigo Duterte nga tagan hin ultimatum o deadline an mga alkalde para tapuson an insurhensiya ha tagsa tagsa nira nga nasasakupan.
Sumala kan Matuguinao Mayor Aran Boller kun may ginhatag nga deadline ha mga local chief executive kaparehas ha ginbuhat ha road clearing operations, maoobliga an mga opisyales nga maghimo hin pamaagi para mapasurender an mga myembro ngan supporters han NPA.
Diri daw mawawara an problema ha insurgency ngan magbabalik balik la ini kon pira la nga mga LGUs iton nagius lugod magbabal-in bal-in la an mga NPA ha lugar nga ginkakarawat la gihapon hira.
“Kon ikaw nga mayor nasuporta ka ha NPA, diri la gihapon ini matatapos nga insurgency ha Pilipinas. Kay kon ako nga opisyal may advocacy ako pero an iba nga munisipyo diri nagius, diri la gihapon matatapos. Magikan dinhe, makadto ha iba nga bungto. Tas pag lie low ko, mabalik na naman, waray katapusan”, an pamahayag ni Boller ha usa nga nga interview.
Kinahanglan daw gihapon nga tanggalon anay an “komunista nga ideolohiya” ha mga barangay nga may impluwensiya hiton NPA san-o maghatag hin serbisyo an gobyerno para masiguro nga diri ini makakawang.
Mababaruan nga gintagan ni Boller hin tulo kabulan an mga rebelde nga sumurender ngan bumalik na ha gobyerno tungod nga hira daw an nakakaulang ha pag-uswag han bungto.
Andam liwat nira buligan an mga surrenderee pinaagi hin paghatag hin livelihood ngan cash assistance nga maabot hin P50,000.
Ha 20 nga barangay nga nasasakupan han Matuguinao, makikit-an daw an mga NPA ha barangay Carolina, San Roque, Ligaya, Inubod, Del Rosario, ngan Rizal.
Mababaruan nga dida han Oktubre han nakalabay nga tuig, 15 nga mga “red fighters” an sumurender ha mao nga bungto ngan pira ha mga ini in ginhimo nga job order employee han munisipyo.
Ginbutangan liwat hin military detachment an bungto para mapudngan an mga ilegal nga aktibidad nga ginbubuhat han mga rebelde.
