TACLOBAN CITY – Ginpahayag han Commission on Human Rights (CHR) nga kinahanglan nga mas pahuguton han Philippine National Police (PNP) an psychological evaluation ngan management hini ha ira personnel.
Ini in kasunod han nahitabo nga panmusil-patay ni Police Senior Master Sergeant Jonel Nuezca ha magnanay nga ha Paniqui, Tarlac nga hira Sonya Rufino Gregorio ngan Frank Anthony Rufino Gregorio.
Sumala kan Atty. Desiree Pontejos, Regional Director han CHR Regional Office 8, dako an epekto han mao nga insidente ha pagtapod han mga katawhan ha mga kapulisan.
Tungod hini in naibanan daw an trust and confidence han publiko ha mga pulis ngan nabalyuan hin kahadlok.
Nagtutuo an mao nga opisyal nga kinahanglan nga pahuguton han PNP an ira pagdumara hin training ha ira mga personnel bahin han anger management ngan pagpatuman han maximum tolerance.Dugang pa hini nga kinahanglan nga dire la ha mga raliyista ngan demonstrasyon sadang nga igpatuman an maximum tolerance han mga kapulisan kundi ha ira kinaadlaw nga pagtatrabaho o pagseserbisyo.
