Sakob na ha finals han Britain’s Got Talent Season 19 an Filipino singer nga hi Matty Juniosa mahuman makakuha hin ika-duha nga Golden Buzzer tikang ha hurado han kompetisyon.
Ha semi-finals round, gin pa bilib ni Matty an mga magkirita ngan hurado ha iya powerful rendition han kanta nga ”Dream On” han Aerosmith.
Mahitungod han iya maupay nga performance, tumindog ngan hin standing ovation an upat nga hurado nga hira Simon Cowell, Amanda Holden, Alesha Dixon, ngan KSI, sugad man an mga live audience.
Gin tagan pagkilala ni Alesha an Pinoy singer, nga gintawag an iya performance nga “effortlessly sensational” ha usa nga “masterclass” nga pag-kanta.
Samtang, hi Amanda naman an pumindot han Golden Buzzer, nga naghatag kan Matty hin higayon agud direkta nga makasulod ha finals.
Manunumduman nga una na nga nakakarawat hin Golden Buzzer hi Matty tikang kan Simon ha iya audition, nga nagdara hini ha semifinals.
Ha pagkayana, presente nga naguukoy hi Matty ha Glasgow, Scotland, kun diin hiya nagtatrabaho kumo part-time waiter samtang aktibo gihapon nga nagpe-perform ha teatro.
