BRITISH COLUMBIA, CANADA – Pumatay hin siyam ka tawo an bayolente nga mass shooting ha usa nga eskuylahan ha British Columbia ha Canada dida han Martes, Pebrero 10, local time.
Ginkumpirma han Royal Canadian Mounted Police nga siyam an biktima ha panmusil samtang an suspek nga gunman in natad-an gihapon nga waray na kinabuhi ngan gintutuohan nga “self-inflicted” an naangkon nga injury. Basar ha report, ginpaangbit ha gin-isyu nga alert nga an suspek in usa nga babaye nga naka-dress ngan kolor brown an buhok.
Unom nga lawas han mga biktima an natad-an ha sakob han Tumbler Ridge Secondary School, duha pa an narekober harani ha usa nga residential property ngan usa an ginbawian han kinabuhi samtang gindara ha ospital.
Kasunod han krimen, ginsara na an Tumbler Ridge Secondary School ngan Tumbler Ridge Elementary School para ha bug-os nga semana.
Samtang, nagpaabot naman hin pakikisubo hi British of Columbia premier David Eby ha pamilya nga namatayan han makarima-dima nga trahediya ngan ginsigurado an suporta para ha mga apektado nga komunidad.
