TACLOBAN CITY — Lima an naawat an kinabuhi samtang masobra mil nga mga kaso hin Dengue an naitala ha Eastern Visayas.
Maabot ha 1,351 an kabug-usan nga kaso han Dengue nga nahipatik tikang dida hiton bulan han Enero tubtob May 21 yana tuig kun diin lima dinhi an namatay tungod ha mao nga sakit.
Sumala kan Jelyn Lopez-Malibago, tagapagyakan han Department of Health Eastern Visayas, mas hitaas ini hin 432% kun igkukumpara han nakalabay nga tuig kun diin maabot la ha 254 nga kaso an naitala ha bug-os nga rehiyon ha kapareho nga mga bulan.
Ha lima nga namatay, usa an nagtikang ha Leyte, 2 ha Southern Leyte, 1 ha Western Samar ngan usa naman ha Eastern Samar.
Ha nasabi naman nga ihap han mao nga Dengue cases, 550 dinhi an tikang ha Leyte, 413 ha Southern Leyte, 151 ha Western Samar, 108 ha Eastern Samar, 70 ha Biliran ngan 59 ha Northern Samar.
Maabot naman ha 32 an mayda mga clustered baranggays kun diin 2 in ha Ormoc City, 2 ha Leyte, 3 ha Eastern Samar, 1 ha Northern Samar, 22 ha Southern Leyte ngan 3 ha Biliran.
Kaudgan ngadaw ha mga nagkakamayda hin dengue in mga kabataan nga kalalaken-an nga nag-eedad 1 tubtob 20 anyos.
Nagpahinumdom naman an mao nga buhatan ha publiko pananglitan makaabat hin mga sintomas hin Dengue nga dayon magpakonsulta ha pinakaharani nga health center agud dayon matagan hin medikasyon.
