TACLOBAN CITY – Ginlalauman han Department of Education – Eastern Visayas nga mas makauli hin damo nga medalya an delegado han Eastern Visayas Athletic Association (EVRAA) han yana nga tuig nga Palarong Pambansa nga pagbubuhaton ha San Jose de Buenavista City, ha Probinsya han Antique yana nga Abril 23 – 29.
Ini an ginpahayag subay ha pakipaghimangraw han Bombo Tacloban kan Dep-ed Leyte Superintendent Al Firmo.
Sumala kan Firmo nga dako na an Tsansa han EVRAA delegation nga humitaas an Standing mahuman nga maging Regular sports an 4 nga dati na nga Demo Sports.
Ini an Billiard, Wushu, Futsal ngan Wrestling.
Ginmalatumat pa ni Firmo nga ha Demo Sports nga Wrestling in 9 tikang ha 10 nga medalya an nakuha han EVRAA Delegation.
Man ngani ha yana nga tuig nga Palarong Pambansa, an medalya nga makukuha ha mga Demo Sports in maapi na para han Over all Medal Tally Standing.
Samtang nakahouse naman yana an 500 nga mga delegado han Sinirangan Bisayas ha Aurellana Elementary ngan National Highschool.
Dugang pa ni Firmo nga nakaantabay an tinaglawas han Dep-ed agud nga maihatag an tanan nga kinahanglanun han mga atleta para han mao nga prestihiyoso nga paisan-isan.
Manunumduman nga dida han nakalabay nga tuig nagika 13 an EVRAA delegation ha Palarong Pambansa mahuman ini nga makakuha hin 6 nga gold, 3 nga Silver ngan 9 nga Bronze.
