NATIONAL–Ginaprubaran han Kamara ha ikatulo ngan urhi nga pagbasa an House Bill No.7239 o an “Line Workers Insurance and Benefits Act” nga nagtutumong nga tagan hin mandatory insurance coverage an yinukot-yukot nga electrical ngan telecommunications line workers ha nasud.
Ha boto nga 197-0, ginaprubaran an panukala kumo pagkilala ha delikado nga trabaho han mga line workers nga gintatawagan nga “vital link” ha suplay han kuryetnte ngan komunikasyon nga nagpapagios ha ekonomiya.
Nakailarom didi an Compulsory Insurance kun diin babatonon han mga employer an premium para ha life, accident, ngan disability insurance han mga trabahador.
Nakadepende naman an minimum nga insurance benefit ha kadako han kumpanya, kun diin P200-K an nakatalaan para ha small kutob P1-M para ha mega large Electric Cooperatives, P1.5-M para ha mga Private Distribution Utilities, ngan P2-M para ha National Transmission Corp./Grid Operator.
Samtang, labot la ha insurance, in obligado gihapon maghatag an mga employers hin retirement benefits, mortuary assistance, ngan reimbursement han medical expenses para ha mga samad nga nakuha samtang ada ha obligasyon.
Sumala kan House Majority Leader Sandro Marcos, usa ha mga pangunahon nga awtor, angay la nga makakarawat hin ensakto nga proteksyon an mga line workers magin hira in regular, contractual, o job order mahitungod ha ayat nga ira ginaatubangan ha pag-papaupay han mga linya hin kuryente ngan kable ha ilarom han tuna.
