NATIONAL — Ginduduso ni Sen. Robin Padilla nga umilarum ha tinuig nga mandatory drug testing an tanan nga mga nahurar nga opisyal han gobyerno kaupod an Presidente han nasud.
Ha Senate Bill 1200 nga tatawagon nga Drug-Free Government Act kun nagin balaud, ginmalatumat ni Padilla nga dapat i-institutionalize an tinuig nga mandatory drug test ha mga pampubliko nga opisyal, sugadman an voluntary random drug test ha mga kandidato ha eleksiyon ha sakob han 90 ka-adlaw ugsa an eleksyon.
Gintagan-duon ni Padilla nga kumo mga empleyado han mga pampubliko nga buhatan, an mga opisyal in kinahanglan gihapon umilarum ha mandatory random drug testing, kasunod ha ira mandato nga iduso an katungon han publiko ngan bumulig nga maibanan, kun dire man matanggal, an paggamit ngan pan-aabuso han droga ha mga komunidad.
Ha ilarum han panukala, pagbubuhaton an testing ha pamamaagi han hair follicle drug test para ha siyahan nga screening, nga posible ma-detect an positibo nga resulta ngan an klase han droga nga gingamit, ngan urine drug test para ha confirmatory testing agud mapamatud-an an bisan ano nga positibo nga result.
An resulta han drug test nga igpapagawas han usa nga accredited drug testing facility in magkakabisa ha sakob han usa ka-tuig.
Kun mapamatud-an nga positibo, posible hira masuspinde o matanggal ha serbisyo kasunod ha balaud.
