TACLOBAN CITY – Mahitungod han susrunod nga mga disgrasya ha kadalanan nga kaurugan in nagreresulta han pagka-awat han kinabuhi in nagdesisyon an Land Transportation Franchising and Regulatory Board nga igbalik an mandatoryo nga Safety Conduct and Training ha mga drivers.
Usa gudman ha mga gintutudlok nga rason han disgrasya in an Human and Mechanical Error.
Ginmalatumat naman ni Land Transportation Franchising and Regulatory Board Eastern Visayas Director Gualberto Gualberto, nga dire nagpapabaya an ira buhatan ha pagpapahinumdom ha publiko labi na ha mga drivers, ha mga kinanahanglan mahibaruan agud makalikay ha disgrasya sugadman masigurado an katalwasan han ngatanan.
Sumala pa hine, mayda existing policy an ira buhatan ha ilarom han Memorandum Circular No. 11-005 nga Terms and Conditions para ha mga transport corporations ngan transport operatives para han pagkakamay-ada hin safety conduct and trainings ha mga drivers.
Gin anunsyo naman hine nga magkakamay-ada utro hin mandatoryo nga drivers academy nga may panuyuan nga masiguro an seguridad han mga pasaheros.
Magkakamay-ada gihapon hin training ngan seminar an ngatanan han mga Public Utility Drivers agud igtutdo ha mga driver an mga aludayday ha ilarom han buhatan, pagsigurado han seguridad samtang nagmamaneho, ngan an mga traffic signs.
Magdudumara gihapon hin supresa nga drug examination o drug testing consultation ha mga PUV drivers pinaagi han Oplan Kaluluwa ngan Oplan Balik-Eskwela, kun diin magbubutang hin health desk an nasabi nga buhatan ha mga bus terminals, public utility terminal, kaupod an mga private terminals para magdumara hin random testing ha mga drivers, partikular na ha mga bus drivers. (via Bombo Niña Magpili)
