Agud masolusyunan an mahugot nga problema ha trapiko ngan polusyon, usa nga kakaiba na programa an igin lunsar han nasud Malta kundiin, babayaran hin 25,000 euros o P1.6M an mga residente nga boluntaryo igsusurender an ira driver’s license ha sakob hin lima ka-tuig.
Sumala kan Transport Minister Chris Bonett, panuyuan han “Driving License Surrender Scheme” nga makahimo hin “mobility shock” ilabi na ha mga kabataan agud diri makasanayan han mga ini nga gumamit hin pribado nga sarakyan ngan mas tangkilikon an pampubliko nga transportasyon.
Kumo pinakaguti nga nasud ha Europa, usa an Malta ha may pinakahitaas nga ihap han sarakyan kabaliktaran ha ihap han mga kalsada hini.
Agud magin qualified an surrenderee, kinahanglan nga 30-anyos tipaubos an edad han driver, pito katuig na nga residente ha mao nga nasud, ngan may lisensya na hin diri mahimubo ha 12-kabulan nga waray record hin mabug-at nga traffic violations.
An magiging bayad ha mao nga “Driving License Surrender Scheme” in ig hahatag hin hulugaan o 5,000 euros kada tuig. Kun magbabag-o an desisyon han drayber ugsa matapos an lima ka-tuig, in kinahanglan hini ig balik an kwarta nga nakarawat.
Waray naman kabarak-an an publiko mahitungod nga nag alutaga an gobyerno hin €5 million pondo, nga sadang para ha syahan nga 1,000 beneficiaries.
Samtang, mahitungod hini kikilal-on kumo permanente nga kanselado an igin surrender nga lisensiya, an hino man nga naruyag pag drayb utro mahuman an lima ka-tuig in kinahanglan pumailarom utro hin 15 hours nga driving lessons agud makakuha hin panibag-o nga lisensiya.
