Nakatalaan magpagawas hi Presidente Ferdinand Marcos Jr., hin usa nga executive order agud igpatuman an price cap nga P50 kada kilo para ha imported nga well-milled rice.
Sumala ha Presidente, igpapagawas hini an executive order agud maipatuman na ini ha mas madagmit nga panahon, kasunod han harampang han Unified Package for Livelihoods, Industry, Food and Transport Committee.
Dugang pa, ginpahaluag gihapon an P20 kada kilo nga bugas nga programa han gobyerno.
Ha presente in mayda na 627 nga distribution centers ha bug-os nga nasud.
Tikang ha anay 600 tonelada nga suplay, sumaka na ini ha 2,000 tonelada mahitungod ha paghitaas han demand.
An nasabi nga pitad in subay ha rekomendasyon han National Price Coordinating Council nga amu an nagmamangulo ha pagbabantay ngan pagpapadig-on han presyo han mga pangunahon nga papliton.
Ginmalatumat gihapon han Presidente nga nagpapabilin ha Suggested Retail Price an presyo han mga pangunahon nga papliton, kaupod an bugas.
Padayon naman an paningkamot han gobyerno nga kontrolon an presyo han 205 commodities ha butnga han presente nga krisis ha enerhiya.
Padayon gihapon nga nakikigsumpayan an gobyerno ha mga manufacturers ngan retailers nga dire la anay hira maghitaas hin presyo kutob ha masunod nga bulan.
Samtang, gin pirmahan gihapon han Presidente an Executive Order No. 110 nga nagdedeklara han State of National Energy Emergency durot han nagpapadayon nga tensyon ha Middle East.
Ha ilarom hini, gintatagan hin kapas an presidente nga magpatuman hin mga pitad para ha fuel ngan energy allocation, sugdman hin mga programa nga pantipid ha enerhiya.
Kaupod gihapon ha kamaduhan an pagpapadig-on han UPLIFT kumo kabug-usan nga framework han gobyerno para ha koordinado nga pagbaton ha mga problema ha pakabuhi, industriya, pagkaon, ngan transportasyon.
