NATIONAL – Ginpahayag han Malakanyang nga dako an bulig ha mga Pilipino ha pagtanggal han Philippine Health Insurance Corporation (Philhealth) ha 45-day benefit limit partikular na para ha mga Pilipino nga nagpapailarom ha hemodialysis.
Ginmalatumat ha Palasyo nga maiibanan an pas-anon han mga Pilipino nga nagkukuri ha kinabuhi.
An pagtanggal han PhilHealth ha 45-day benefit limit in subay ha direktiba ni Presidente Ferdinand Marcos Jr.
Sumala kan Palace Press Officer USec Claire Castro, an pagtanggal han PhilHealth ha 45-day limit in agud masigurado nga an mga sebisyo han ahensya in magpapabilin nga waray makaurulang.
Dugang pa ni Castro, damo nga mga serbisyo an nagkikinanglan hin sobra 45 days nga coverage sugad nala han hemodialysis.
Ha nasabi nga 45-day benefit limit hadto, gintutugutan an mga PhilHealth members hin maximum nga 45 days nga pagkaka-confine ha hospital ha kada tuig.
Yana in gintanggal na ine kun diin mas nagkakamay-ada hin inclusive approach para ha iba pa nga medical services.
