Gin sigurado han Malakanyang nga kontrolado han administrasyon Marcos an sitwasyon ha nasud ha butnga han gin aabat nga epekto han kasamok ha Middle East, partikular na an padayon nga oil price shocks.
Ini an nagin baton han Palasyo mahuman nga manawagan hi House Deputy Speaker Raymond Democrito Mendoza kan Presidente Ferdinand ‘Bongbong’ Marcos Jr. nga magdeklara hin state of national emergency agud temporaryo nga kaptan han gobyerno an oil industry ngan makontrol an presyo han petrolyo.
Ha usa nga press briefing, gin klaro ni Palace Press Officer Undersecretary Atty. Claire Castro nga dire aada ha sugad nga krisis an nasud; hangyo pa han opisyal, likayan an pagpapasarang hin kahadlok ha publiko.
Agud malikayan an epekto han krisis, iginlatag ni Presidente Marcos an mga direkta nga pitad han gobyerno.
Sumala ha punong ehekutibo, maghahatag an fuel subsidies an Department of Agriculture (DA) ngan Bureau of Fisheries and Aquatic Resources (BFAR) para ha mga parag-uma ngan paru-pangisda.
Ginlalauman gihapon an pag-iiban han Civil Aviation Authority of the Philippines (CAAP) ha passenger service charges, landing fees, parking fees, ngan iba pa kabaraydan ha paluparan.
Syahan na nga ginpangunahan han Presidente an panhatag hin P5,000 cash asistance para ha mga drayber han mga public utility vehicles nga duro nga apekato han serye han paghitas han presyo han lana.
