Igin diwara han Malacañang Palace an alegasyon ni Senator Imee Marcos nga may nahihinabo nga pamimirit ngan pag hulga ha mga mambaraload agud suportaran an impeachment complaint kontra kan Vice President Sara Duterte.
Subay kan Palace Press Officer Claire Castro, waray basehan an mga akusasyon kun diri ini gin kakalakipan hin klaro nga ebidensya.
Dugang pa han opisyal han Palasyo nga baga-baga hin nasasanay na an pira nga personalidad ha pagpapalutaw hin mga hurob-hurob ngan intriga kontra hin mag hatag hin konkreto nga ebidensya. Gin tudlok hini hi anay Pangulong Rodrigo Duterte kasumpay han mao nga pamahayag.
Una na nga gin malatumat ni Sen. Marcos ha usa nga video statement nga may-ada pira nga miyembro han House of Representatives ngan Senado an na atubang ha panhahadlok ngan hulga hin kaso kun diri an mga ini sumuporta ha impeachment complaint kontra kan Duterte.
Sumala ha senadora, may-ada mga mambaralaod an daw gin huhulgaan hin reklamo nga ighahaon ha Office of the Ombudsman, samtang daw in gin gagamit an pira nga ahensya sugad han Department of Justice (DOJ), National Bureau of Investigation (NBI), ngan Securities and Exchange Commission (SEC) agud ipiton an mga diri pabor ha impeachment.
Dugang la hini, may-ada pira nga pondo han mga mambaralaod an naatrasar mahuman markahan kumo “for later release” o FLR, butang nga nakaapekto ha mga proyekto para ha ira mga distrito.
Ha kaluyo hini, waray naman mag hatag hin ngaran an senadora hin mga opisyal nga nakakaexperyensya hin pressure tikang ha administrasyon.
Nakatalaan pagbotosan han Kamara an articles of impeachment kontra kan Duterte, kudiin, kinikinihanglan hin diri maubos ha 106 nga botos agud maipasa ha Senado para ha masunod nga hearing han kaso.
