TACLOBAN CITY – Kinse nga mga kaapi han Sangyaw Festival of Lights 2024 an mas magpapalamrag han downtown area han Tacloban City yana nga Hunyo 29, 2024.
Trese han mga kaapi dinhi in tikang la ngahaw ha syudad, samtang an duha naman in tikang ha iba pa liwat nga mga probinsya ha Sinirangan Bisayas an kaapi han floats nga puno naman hin mga suga ngan sugad man gihapon an ira Dance Ritual presentation.
Sumala han Tacloban City Tourism Operations Office nga malibot an parada ha mga panguna nga kakarsadahan han syudad (Magsaysay Boulevard—Justice Romualdez—Rizal Avenue—Imelda Avenue—Real St.—Magsaysay Boulevard), pero kun han una nga tuig in naukoy an contingent ha usa nga lugar han karsada para magpakita han Dance Presentation, yana in pagbubuhaton na ini ha Balyuan Grounds.
Ini daw in agud nga malikayan nga matabo utro an kaparehos han una nga tuig nga naiha, nag utod-utod an parada ngan nagkaada pa hin pagkalipong han mga magkirita.
Nakakarawat naman hin kabug-usan nga P250,000 nga subsidy tikang ha City Government an mga kaapi agud nga makadugang ha pan gastos nga gagamitun nira para ha float ngan pati na gihapon an mga props ngan costumes.
Ginlalauman gihapon nga magigin star studded an Sangyaw Festival of Lights 2024 tungod han mga artista nga matambong ngan makikiduyog han selebrasyon, ngan sugad man gihapon an pag itsa han mga mansanas nga nagin kaparte na gihapon han tradisyon.
Nakatalaan nga magtikang an mao nga festival ha ala-5 han kulop.
