Nagpahimatngon ha publiko an mga eksperto nga an mga glacier ha Himalayan region nga nagsisirbe kumo importante nga gin kukuhaan hin tubig han subra 2B ka tawo, in natutunaw na ngan mas doble an katunaw hini yana kumpara dida han nakalabay nga tuig 2000.
Sumala ha International Centre for Integrated Mountain Development (ICIMOD), an Hindu Kush-Himalayan mountain range nga na abot tikang Afghanistan kutob Myanmar in usa ha pinakadako nga tambakan hin yelo ha bug-os nga kalibutan ha gawas han Arctic ngan Antarctica.
Ginpupuno hini an diri maubos ha 10 nga pangunahon nga mga salog ha Asya nga gin titikangan han suplay han tubig, pagkaon, ngan enerhiya.
Basar ha pag eestudyo han mga eksperto, haros dumoble an kadagmit han pagnipis han mga yelo tikang 34 sentimetro kada tuig ugsa an tuig 2000, yana in na abot na ini ha 73 ka sentimetro an pag nipis.
Ha kabug-usan, umabot ha kutob 27 ka metros an naiban ha kadakmol han yelo tikang 1975, samtang 12 porsiyento naman han glacier area an dayon na nga nawara ha butnga han 1990 ngan 2020.
Pag eeksplikar han mga siyentipiko, durot ini han padayon nga paghitaas han temperatura ha kalibutan nga nagpupugong ha mga glacier nga mapabilin an kadakmol han mga yelo hini.
Dugang pa hini, an polusyon sugad han black carbon tikang ha pagsusunog han fossil fuels ngan mga basura in usa ha mga nagpapadagmit ha pag tunaw han mao nga mga glaciers.
Dugang pa han mga eksperto, ini nga problema in diri la para ha mga masunod nga panahon kundi usa gihapon ini nga krisis nga nahihinabo yana nga panahon salit kinahanglan hini hin madagmit nga pitad agud mapahinay an epekto hini ug ma proteharanan an suplay ha tubig ha rehiyon.
