TACLOBAN CITY — Ginpahayag han Department of Education (DepEd) Regional Office 8 nga mas dumamo na yana an mga skwelahan nga nakiparte han limited face to face classes ha Eastern Visayas.
Sumala kan Jasmine Francisco Calzita, tagapagyakan han DepEd 8, yana nga semana ada na ha 400 nga mga skwelahan tikang ha 12 nga division ha rehiyon an nag abre para han face to face classes.
Diri pa naman kalakip ha mao nga ihap an Tacloban City Division matungod nga nagpapadayon pa an gindudumara nga validation ha mga skwelahan nga makikiparte.
Dugang pa hini nga nagin hapsay an implementasyon han face to face classes ha mao nga mga skwelahan.
Ginsisiguro naman han buhatan nga nasusunod an standards of the School Safety Assessment Tool (SSAT) agud nga maproteheran an mga kabataan ngan mga magturutdo.
