TACLOBAN CITY – Gin pahayag ni Bureau of Jail Management and Penology VIII Regional Director, JSSUPT. Bernardo Sanchez, nga mahitungod han kaluma na han building o presuhan an hinungdan han paka-iskapo han usa nga Person Deprived of Liberty (PDL) ha Male Dormitory dida han nakalabay nga adlaw.
Ginkilala an naka-iskapo nga PDL kan Juvan Roy Docena, residente han Brgy. 101, Tagpuro, Tacloban City, ngan nag-aatubang ha kaso nga carnapping.
Ha pag-istorya ni JSSUPT. Sanchez, nadiskubrehan nga may-ada naka-iskapo nga preso dida han pagdumara han first head count han mga pasado alas-5 han aga, kun diin dayun naman ine nga gin-validate ngan didto in nakumpirma nga kulang hin usa an mga preso.
Dayun naman nga nagdispatch an warden han nasabi nga dormitory hin grupo nga nanginano han posible nga gin agian han naka-iskapo nga PDL.
Samtang, gintudlok naman han mga cellmate han nasabi nga PDL kun diin ine posible nga umagi mahitungod nga an nahimumutangan han mga ine in luma ngan guba-guba na nga building.
Dida han madakop na utro an PDL in nahibaruan nga didto ine umagi han usa nga buho nga yero ngan naglakat ha atop han building ngan lumukso naman ine ha ubos han building ngan sumaka utro ha perimeter fence.
Ha pagkayana in plano naman han BJMP 8 nga mas pahuru-hugton pa an seguridad nga nga ginpapatuman ha sulod han nasabi nga pasilidad ngan magbutang hin secondary fence ngan double barb wire o military wire.
