Utro nga igpapatuman han Land Transportation Franchising and Regulatory Board (LTFRB) an service contracting program para ha mga drivers han public utility vehicles (PUV) agud mabuligan hira nga maakos an padayon nga paghitaas han presyo han lana.
Subay ha LTFRB, iglulunsar an program ha pili ha ruta ha Metro Manila ngan iba pa nga urban areas agud masigurado an padayon nga biyahe han mga commuter.
Nagin limitado an operasyon han pira nga PUV mahitungod ha susrunod nga paghitaas han presyo han lana tikang han magtikang an kasamok ha Iran dida han Pebrero 28.
Ginmalatumat ni acting Transportation Secretary Giovanni Lopez nga naghangyo na an ira ahensya han P1 billion ha Department of Budget and Management (DBM) para ha target nga implementasyon han program ha Abril 15, 2026.
Sakop han programa an mga bus ha EDSA, mga jeep nga nabiyahe harani ha Light Rail Transit (LRT) ngan Metro Rail Transit (MRT), pati na gihapon an iba pa nga PUV nga naagi ha mga pangunahon nga transport hubs ha Metro Manila.
Igpapatuman gihapon an programa ha Davao City, Cagayan de Oro City, ngan iba pa nga urban areas.
Syahan nga iginpatuman an service contracting dida han 2020 ha ilarom han Republic Act No. 11494 kumo baton ha epekto han pandemya, kun diin gintagan hin senimana nga subsidiya an mga drivers basar ha iya biyahe.
