KUTA KANKABATO, SAN JOSE, TACLOBAN CITY – Gin kumpirma han Leyte Police Provincial Office nga nag-negatibo ha gindumara nga paraffin test an pito nga kapulisan tikang ha Ormoc City nga gintutudlok nga mga Persons of Interest ha nahitabo nga pamusil kan Albuera, Leyte Mayoralty candidate Kerwin Espinosa ha Brgy. Tinag-an, Albuera, Leyte.
An paraffin test o dermal nitrate test in usa nga tradisyunal nga pamaagi agud mahibaruan kun mayda presensya hin gunshot residue ha kamot han usa nga indibidwal ngan kun bag-o la ine nga nagpabuto hin pusil.
Ha gindumara nga press conference ha Kuta Kankabato, San Jose, Tacloban City, ginmalatumat ni Leyte Police Provincial Office, Provincial Director, PCol. Dioniso Apas Jr., nga 14 nga mga pusil an boluntaryo nga ginsurender han mga Persons of Interest han insidente han pamusil ha Brgy. Tinag-an, Albuera, Leyte samtang nangangampanya hi Albuera, Leyte Mayoralty candidate Kerwin Espinosa.
An mga ine in amu an: unom nga 5.56 calibre rifles, duha nga .45 calibre pistols, usa nga Mini Uzi submachine gun, ngan lima nga 9mm pistols.
Nahibaruan gihapon nga lima han unom nga 5.56 calibre rifles, duha nga .45 calibre pistols, ngan an Mini Uzi submachine gun in waray rekord hin rehistro ha Regional Civil Security Unit 8 (RCSU), samtang usa la ha unom nga rifles an nakarehistro ha usa nga indibidwal.
An lima nga 9mm pistols naman in gin validate han Regional Logistics and Research Development Division (RLDDD) kumo opisyal nga gin isyu ha mga dabi nga kapulisan.
Ha lain nga bahin, ha gindumara nga forensic examination, nagawas nga operational o nagana an ngatanan han 14 nga mga pusil, kun diin nagpositibo ine nga mga pusil ha gunpowder residue examination, samtang negatibo o waray naman nakit-an nga salin o agi hin pulbura ha kamot o panaptop han mga Persons of Interest.
Mahitungod hine nga mga resulta, ginpasakahan na hin mga reklamo an pito nga indibidwal kontra ha pagtalapas han Comprehensive Firearms and Ammunition Regulation Act (RA 10591) ngan Gun Ban ha ilarom han COMELEC Resolution 11067.
Samtang, nagpapadayon naman an imbestigasyon kasumpay han reklamo nga Frustrated Murder kun diin gintitirok pa han mga otoridad an mga ebidensya samtang ginkikita an pira nga posible nga motibo han pamusil.
