TACLOBAN CITY– Padayon an gindudumara nga check-points hiton mga kapulisan ha Sinirangan Bisayas, kasumpay ine ha ginpapatuman nga gun-ban para hiton 2025 Midterm Election.
Sumala kan Leyte Police Provincial Office, Public Information Officer , PLt Mary Antonette Espina, tikang han magpatuman hin gun-ban in masginpahuruhugot pa nira an pagbabantay, agud nga masigurado an mahimyang nga piniliay.
Dugang pa hine, nagpasarang na gihapon hira hin mga tinaglawas ha magkalain-lain nga lugar han Leyte agud nga matutukan an seguridad han mga sibilyan.
Ginpaangbit hine nga waray pa hira nadadakop nga nakatalapas han nasabi nga gun-ban, nga ginpapatuman hin Comission on Election COMELEC, para hiton piniliay yana nga Mayo 2025.
Naghangyo naman ine ha tanan nga mga motorista, magin adton may mga pribado nga sarakyan, nga makig-kooperar ha mga otoridad, matungod nga an ira gindudumara in alinsusunod ha mandato nga ginhatag ha ira agud nga ma-mintinar an mahimyang ngan malinapuson nga election.
