TACLOBAN CITY – Nakatalaan magtindog hin local community college an syudad han Ormoc para masulbar an problema ha pagtaga job mismatching han mga nag gragraduate tikang ha magkadurudilain nga mga kurso ngan eskwelahan.
Sumala kan Mayor Lucy Torres, nga ha pagkayana in nagkakaada hira hin surveys ngadto han mga estudyante ngan pati gihapon an mga establisyemento ngan negosyante ha mao nga syudad para masigurado nga waray mananabo nga mismatching han mga estudyante nga ma gradwar.
Ini manggud in para daw mahibaro hira nga an mga kurso nga ig ooffer han community college in nakabase ha job opportunities ngan in demand ha mao nga syudad.
Dugang pa ni Torres, target nira nga magkaada la anay hin tulo ngada ha lima nga mga in-demand nga mga kurso mahitungod nga an ira manggud target in magkaada hin trabaho an mga graduates ha syudad han Ormoc o di ngani ha kahigrani nga mga bugto ngan diri ha gawas han rehiyon.
Ginpasabot gihapon han nasabi nga opisyal, nga an mga magigin estudyante nga taga Ormoc nga kwalipikado in makakakarawat hin full scholarship.
