TACLOBAN CITY – Ginklaro han Leyte Metropolitan Water District (LMWD) an rason han pagkadelatar han paghingayad han pira nga mga karsada nga gin-ungkab para han pipeline rehabilitation han water system han syudad.
Sumala kan Tess Pascua, tagapagyakan han LMWD, ready for restoration na an pira nga karsada ha syudad partikular na an Imelda Avenue, Juan Luna, Sto. Niño, Del Pilar, Salazar nga dalan.
Pero tungod han malain nga panahon ngan masukot nga pag-inuran nalalangan an pagrestore ngan pagsemento han mga karsada nga ginbuho para han pipeline rehabilitation.
Target naman han LMWD na matapos an paghingayad ha mao nga dalan san-o mahuman an 1st quarter yana nga tuig.
Nanawagan naman ini ha publiko ngan mga motorista nga maghirot ngan maging mabinantayon ha mga karsada nga waray pa karestore agud nga malikayan an disgrasya ha kadalanan.
