Ha kaluyo han iginduduso han pira nga magbabalaod nga total ban ha online gambling, abri hi Senate Committee on Games and Amusement Chair, Sen. Erwin Tulfo nga magkamay-ada hin mas mahugot nga regulasyon kontra hine.
Sumala ha senador, manginginahanglan hin executive authority an total ban samtang waray pa balaod nga magbabawal ha online gambling, kaupod na an pagkakagamit ha mga e-wallet ha betting process.
Mahitungod hine, mas maupay daw nga dayun nga makaghimo hin restriction ha sistema han online gambling agud mapugngan an duro nga pagkaka-abuso hine, ngan umabot ha pagkaka-lunod ha utang. An mas mahugot nga restriction daw in pwede la igpatuman han mga gaming regulator ha nasud.
Kaupod dinhi an limitado nga oras han pagmumulay para ha ngatanan han gambling platform.
Dinhin in pwede igrekomenda an pira kaoras la nga pagmumulay sugad han alas-6 han gab-i kutob alas-12 han maagahon, dire sugad han presente nga 24/7.
