MAKATI CITY – Gintagan-duon ni Presidente Ferdinand Marcos Jr., nga importante maipadayon an presente ng mga reporma han iya administrasyon ha pamamaagi han paghurar han “like-minded president” ha 2028 agud dire masayang an mga benepisyo nga natikangan na.
Ha usa nga forum ha Makati City, ginmalatumat han president nga kun dire mahurar an masunod nga lider nga kaparehos an direksyon han presente nga administrasyon, possible mawara an mga programa pan-ekonomiya ngan pansosyedad nga yana in nagtitikang na magpakita hin positibo nga epekto.
Eksplikar ni Presidente Marcos, kadaras-an mangud ha politika an pagpapaundang ha mga proyekto han nakalabay nga administrasyon mahitungod ha pansukna han mga kalaban, ngan an sugad nga Sistema in maabot magin ha national level.
Ginklaro gihapon han Presidente nga dire hiya aada ha puwesto para ha pankalugaringon nga interes kundi agud magduso hin mga structural reforms nga magpapakusog ha ekonomiya ngan himuon nga mahusay an Pilipinas ha mga investors.
Ginparayaw naman han Presidente nga ginpaparibhong pa han gobyerno an mga programa ha edukasyon, panlawas, ngan social benefits agud maabatan dayon han publiko an benepisyo ngan dire ini basta matanggal ha sunod nga administrasyon.
Aminado naman an Presidente nga makuri ig-eksplikar ha publiko an mga urusturyahon nga pan-ekonomiya sugad han inflation, GDP growth, ngan debt-to-GDP ration.
