TACLOBAN CITY – Ginhihingita han lokal nga pamunuan han Matag-ob, Leyte nga makagtanom hin 10,000 nga mga puno hin kahoy kada tuig agud makabulig nga maiban ibanan an epekto han climate change ngan maproteksyunan an kalibungan.
Ha usa nga interview, ginpahayag ni Matag-ob Leyte Mayor Bernie Tacoy nga maabot na hin sobra 10,000 nga durudilain nga mga puno hin kahoy an ira gintanom ha ira bungto ha sakob hin sobra usa katuig.
Kaupod dinhe an gindumara nga tree planting activity dida han nakalabay nga Agosto 28, kon diin kaupod an Office of the Vice President, Department of Environment and Natural Resources (DENR) ngan mga vounteers gintamnan hin sobra 8,500 nga mga puno hin kahoy an 13.6-kaektaraya hin tuna ha Barangay Malazarte.
Dugang pa ni Tacoy nga agud agud masustiner an pananom hin kahoy, ira ginre-require ha mga igkakasal ha bungto nga magtanom anay hin mga puno
Gin aaghat gihapon nira an mga turista nga mabisita Bondari Peak ngan an mga kandidato ha Barangay Sanggunian Kabataan Elections nga magtanom hin mga puno.
Mayda liwat gin-assign nga mga empleyado an LGU para panginanuon ngan alagaan an mga bag-o nga mga gintanom nga mga kahoy.
”It is our way to make Matag-ob clean and green again. In this way we can help the word to mitigate the effects of climate change and maalagaaan din natin ang ating mga water shed dito sa Matag-ob”, pahayag ni Tacoy.
Samtang, labot la ha pananom hin kahoy, ginpapatuman gihapon ha bungto an waste segregation ngan pagrecycle han mga basura kumo kaparte han ira environmental protection policy.
