TACLOBAN CITY – Nagka-urusa an lokal nga panggobyernohan han Tacloban ngan Basey, Samar ha paghatag hin bulig ha mga na-stranded nga truck drivers ngan mga pasahero han San Juanico Bridge.
Sumala kan Department of Social Welfare and Development Eastern Visayas Information Officerm, Atty. Jonalyndie Chua, dire la an Department of Social Welfare and Development (DSWD) an nagbubuhat hin aksyon, kundi kaupod gihapon an City Social Welfare and Development Office (CSWDO) han Tacloban ngan Basey, Samar nga naghahatag hin serbisyo ha mga apektado.
Subay han report han DSWD 8, umabot na hin 2,736 an family food packs ngan 1,091 bottled waters an naipanhatag tikang pa han Mayo mahuman igpatuman an restriksyon ha San Juanico Bridge.
Naghatag gihapon an DSWD Region 8 hin ₱11,000 nga transportation assistance ha ilarom han regular nga programa han DSWD nga Assistance to Individuals in Crisis Situation (AICS), kun diin duha nga truck drivers an nakakarawat.
Padayon gihapon an presensya han DSWD 8 ha ira assistance desk ha Leyte ngan Samar, dire la ha Amandayehan kundi pati ha Tacloban City, Calbayog City, Ormoc City, ngan Liloan, Southern Leyte.
Padayon pa naman an profiling han DSWD 8 mahitungod nga permanente ngan padayon man gihapon an operasyon han mga truckers.
Ginpahimatngon naman ni Atty. Chua nga may-ada naka-standby nga 142,940 family food packs, 29,767 non-food items, ngan standby funds nga nagkakantidad hin ₱2,118,000 para ipanhatag ha mga nanginginahanglan.
Padayon gihapon an kooperasyon han DSWD 8 han mga LGUs agud masiguro nga matatagan hin bulig an mga nanginginahanglan. (via Bombo Shiela Enciio)
