TACLOBAN CITY – Usa nga naa-agnas na nga lawas hin lalaki nga waray pa pangilal-an an nakit-an ha Brgy. Hiparayan, Gandara, Samar.
An pangilal-an la han biktima in lalaki, ada ha 30s ngada ha 40s an edad, nakasul-ot ine hin branded ngan tsinelas, ada ha 5’2 an kahitaas, medyo halaba an buhok, ngan mabusag-busag an kapanit.
Sumala kan PMaj. Jonathan Camacho, OIC Chief of Police hiton Gandara Municipal Police Station, usa boy an nakakita han nasabi nga lawas kun diin dayun naman ine nga nagreport ha mga kapulisan.
Madagmit naman an nagin respondi han mga otoridad kun diin dayun nga gin-verify han mga ine kun tinuod an nasabi nga report ngan pag-abot ha lugar in didto nakit-an an nasabi nga patay nga lawas.
Basar han panginano han mga otoridad, ginbabana-bana nga maabot na ha duha ngada ha tulo ka-adlaw an kaiha han patay nga lawas mahitungod nga nakada na ine ha state of decomposition kun diin posible nga ginhulog la an nasabi nga lawas ngan didto ha iba nga lugar ine ginpatay.
Ha pagkayana in nagkiki-pagsumpayan na hira ha mga kahigrani nga istasyon mahitungod nga basar han ira gindumara nga pamakiana in waray nawawara nga tawo ha ira lugar.
