TACLOBAN CITY – Usa nga lalaki ha Brgy. Can-abay Basey Samar an samaran mahuman nga matigbas han tatay han iya kainom nga iya igin kaaway.
Ginkilala an biktima kan alyas Tatong, ada ha legal nga pangidaron, samtang an suspek in ginkilala kan alyas Isabelo, 77-anyos an pangidaron, ngan parehas residente han nasabi nga lugar.
Sumala kan Basey Municipal Police Station Chief of Police, PMaj. Niño Cabañas, dara han kangalas han suspek in natigbas hine an biktima.
Basar han inisyal nga imbestigasyon, nag-iinom an biktima ngan an anak han suspek han magkamay-ada an mga ine hin mapaso nga debate nga nagresulta han ira pagsuntukay.
Gin aawat daw han suspek an biktima ngan an anak hine nga nagsusuntukay pero waray an mga ine magbubulag, sanglit dara daw han kangalas han suspek in kumuha ine hin sundang ngan natigbas an biktima.
Nag-angkon naman hin tinigbasan ha may wala nga kamot ngan luyo nga parte han lawas an biktima.
Ha pagresponde han kapulisan in nagbabaktas na daw an biktima tipakadto ha may San Juanico ngan tikadto na unta ine ha EVMC, sanglit gin dara ine han mga otoridad tikadto naman ha Basey District Hospital agud matagan hin kaangayan nga atensyon-medikal pero waray daw ine magpatahi han iya samad.
Samtang, nagsurender naman an suspek ha Barangay Kapitan han nasabi nga barangay, ngan gin dara ine ha Basey MPS kaupod gihapon an biktima kun diin nagka-sabot an duha nga partido nga dire nala magpapasaka hin kaso an biktima ha suspek.
