TACLOBAN CITY – Usa nga lalaki ha Brgy. Balinsasayao, Abuyog, Leyte an ginpanigbas-patay.
Ginkilala an biktima kan alyas “Randy”, 38-anyos an pangidaron, samtang an suspek naman ginkilala kan alyas “Rocky”, ada ha legal nga pangidaron ngan parehas residente han nasabi nga lugar.
Sumala kan Police Executive Master Sergeant Roan Ramos, Officer of the Day hiton Abuyog Municipal Police Station, love affair ha butnga han misis han suspek ngan han biktima an ginkikita nga rason han insidente.
Subay hiton impormasyon, naglalakat tikapadto ha karsada an biktima nga tikang pala pag inom-inom han tigda ine nga tigbason han suspek nga sekreto nga nagsisinunod la han biktima.
Gin dara pa naman an biktima ha hospital pero gindeklara na ine nga dead-on-arrival.
Kumalagiw naman an suspek mahuman an insidente pero naaresto gihapon gihapon mahuman nga paghalpaton han mga kapulisan.
Ginpasakahan naman hin kaso nga murder an suspek ngan nakapaslak na ha Abuyog Municipal Police Station.
