TACLOBAN CITY – Patay mahuman nga pagbun-on an usa nga lalake han iya la mismo kalugaringon nga bayaw ha Brgy. Daganas Catarman, Northern Samar.
An biktima in kinalala kan Sherwin Morallos, 27-anyos, usa nga job order employee samtang an suspek in kinilala nga hi Randy Salazar de Luna, 32-anyos, waray trabaho ngan magbayaw la an mga ini ngan nag-uukoy ha nasabi nga baranggay.
Sumala kan PMaj. Wilfredo Jimenez, Chief of Police han Catarman Police Station, han matabo an mao nga insidente in nakaon an biktima kaupod an iya asawa ha ira panimalay kun diin an suspek in nakadto gihapon.
Basar ha inisyal nga imbestigasyon, tigda lumibot an suspek ha ira luyo agud kumuha hin sundang ngan mahuman ini in tigda hini nga ginbuno an biktima ha bungkog nga parte han iya lawas.
Dayon nga dumalagan para kumalagiw an suspek ngan ginlanat pa ini han biktima pero matungod ha iya naangkon nga samad in natumba ini.
Gindara pa ha ospital an biktima pero tungod han naangkon nga binun-an ha lawas in waray ini ilob ngan naawatan hin kinabuhi.
Basar naman ha pahayag han pamilya han biktima in mayda ngadaw gutiay nga deperensiya ha panhuna-huna an mao nga suspek.
Naaresto an suspek mahuman nga magdumara hin hot pursuit operation an mga kapulisan ngan ha pagkyana in nag-aatubang na ini ha kaangayan nga sirot.
