NATIONAL–Duro nga ginbatikos ni Senate President Pro Tempore Panfilo “Ping” Lacson an paggamit hin mga ad hominem o personal nga pagatake ha mga opisyal ngan mambaralaod nga nanindigon para ha soberanya han Pilipinas ha West Philippine Sea (WPS).
Ini in nagin tugon ni Lacson mahuman nga nagpahayag hi Rep. Paolo Henry Marcoleta nga himuon nga bala ha kanyon an usa nga spokesperson han Philippine Coast Guard ngan pira nga mga senador kun pananglitan magdeklara hin gyera an China kontra ha Pilipinas.
Kasumpay an mga nagin pahayag ni Marcoleta mahuman nga ginbatikos an iya tatay mahitungod ha suhestyon nga igsurrender an Kalayaan Island Group (KIG).
Kasunod hine, ginaghat ni lacson hi Rep. Marcoleta nga bisitahon an Pag-asa Isla han KIG nga parte han probinsya han Palawan, agud nga personal nag makit-an ngan ma-eksperyensya an maupay ngan nagana nga local nga pangobyernuhan ha lugar.
Gintagan hin fuon gihapon han senador nga an KIG in usa nga munisipyo han Palawan nga mayada buhi nga komunidad ngan pangobyernuhan kun diin ginpahayag pa niya nga han iya pagbisita didto, naobserba hine mismo an pag-aaligid han mga barko han Chinese Coast Guard ha lugar ngan ginaghat an mga nakatalaga nga military nga dire umundang ha pagdepensa ha teritoryo han nasud.
Mababaruan nga ha usa nga pahayag ha internet han ika 6 han Pebrero, gintawagan ni Rep. Marcoleta nga “traydor” an mga naninindigon para ha WPS ngan ginaalegar nga ginbubutang la ha risgo an mga Pilipino.
