Iginparayaw han 53-anyos nga kung-fu master nga hi Zhang Longxiang an kakaiba nga resulta han iya duha kadekada nga disiplina mahuman dumakmol an iya mga palad hin doble kumpara ha komon nga kadako. An iya tu-o nga palad in mayda kadakmol na yana nga sobra 3 inches mahitungod ha martial arts training nga ‘Iron Sand Palm’.
Nagtikang an determinasyon ni Zhang dida han 1998 han makilala niya an sikat nga kung-fu master nga hi Yang Xinchuan. Ha sulod han 15 katuig, nag-aram ngan nagserbi hiya nga apprentice hini kun diin ginhag-id hiya ha masakit nga routine.
Sumala kan Zhang, waray ini sekreto kundi puro nga kamaduruto; ginlalamba han iya kamot an sako nga puno hin mga bakal hin 6,000 kabeses kada adlaw ha sualod han duha ngada ha tulo kaoras. Ginklaro naman hini nga himo-himo la tikang ha mga pelikula an paglunod han kamot ha karaha nga mayda mapaso nga baras.
Agud maproteheran an iya mga kamot tikang ha duro nga danyos ngan mabuligan an pagdakmol han panit, nagpapahid hiya hin medicinal wines nga ginhatag han iya magturutdo. An maiha nga proseso in nagdurot hin dako nga kubal ha iya mga tudlo ngan palad.
