PALO, LEYTE – Viral ha social media an kuha han CCTV nga nagpapakita han pagbalbag ngan pagdanas han usa nga Brgy. Tanod ha 17-anyos nga lalaki nga gin-aalegar dabi ha natabo nga riot ha Brgy. Naga-Naga, Palo, Leyte, han Pebrero 27 han yana nga tuig.
Ha pakikipaghimangraw han Bombo Radyo Tacloban kan Daisy Cuesta Pallares, Nanay han menor de edad, in gindanas, ginrabotan ngan duha ka-beses nga gin-balbag an iya anak ha ulo nga hinungdan han pag-black out hini.
Aminado naman ini nga plano na han iya anak nga bumulig han riot pero waray pa man ini pakaka-probar han pagsuntok in nandadlagan na an mga indibidwal nga dabi han riot.
“Nasugad an ak anak [nga] tikadto unta hira pagbulig han riot pero tipakadto pala hira in nanadlagan na an igriba, nanadlagan liwat hira…”
Tungod nga hiya an harani han tanod in hiya dayon an nasakpan hini.
Ginhuhulat naman yana han pamilya han menor de edad an resulta han iya medical examination.
“Ginpa-medical ko an akon anak…Waray pa resulta kay usa pa nga doctor it mapirma, duha man kuno nga doctor it mapirma han medicolegal…”
Samtang, subay naman ha pahayag ni Kap. Gaspar De Veyra, Brgy. Kapitan han Naga-Naga, Palo, Leyte, diri la ine an siyahan nga beses nga nasakpan an mao nga menor de edad nga api ha mga riot-riot ha mao nga lugar.
Ha pagkayana, ginpahuruhugot na ni De Veyra iton prensensiya hiton mga Brgy. Tanod ha lugar han insidente agud nga malikayan an bisan ano man nga kasamok han komunidad.
“Masukot man gud iton riot-riot ha pag-ultan hiton St. Michael ngan hiton Naga-Naga. Iton nga mga kabataan nga pirme dabi inin mga taga-Sta. Cruz, Cavite East, Cavite West, ngan Purusima. Iton ira pirme kontra in mga taga-St. Michael nga aadi ha Ilawod. Yana naman in bubutangan namon hin mas damo pa nga tanod hiton nga lugar kay agud maibanan iton mga riot-riot. Kay atleast once nga kumita nga inin nga mga kabataan hit mga tanod in magkakahahadlok pag-riot…” (via Bombo Shiela Encio)
