Igin pagawas han Department of Education (DepEd) an opisyal nga kalendaryo ha mga pampubliko nga eskwelahan para ha School Year 2026–2027, nga nakatalaan magtikang ha Hunyo 8, 2026 ngan mahuhuman ha Abril 8, 2027.
Ini in kasunod han pagpapatuman han three-term structure ha basic education nga kaparte han mga reporma nga igin patuman agud pahusayon an pagtututdo sugad man ma solbar an learning gaps han mga estudyante.
Ha ilarom han plano, mahagos an school year ha sakob hin 201 ka adlaw nga klase ug tutungaon ini ha tulo ka termino, nga bubug-oson han opening period, instructional phase, ngan end-of-term activities.
Magtitikang an syahan nga termino ha mga pa una nga hirimuon han eskwelahan tikang Hunyo 8 kutob 11, nga susundan han regular na
nga klase tinikangan Hunyo 15 kutob syahan nga parte han Setyembre nga matatapos pinaagi han mga exam ug mga hirimuon han kaburubutngaan han Setyembre.
An ika duha nga termino in magtitikang ha kaburubutngaan han bulan hiton Setyembre kutob syahan nga parte han Disyembre, nga hihimuon an mga hirimuon ugsa an holiday break.
Samtang, mabalik naman an mao nga klase ha Enero 2027 para ha ikatulo nga termino, nga mahagos kutob ha bulan han Marso nga susundan han mga final exams ngan closing activities ha syahan nga parte han Abril 2027.
Subay ha DepEd, panuyuan han bag-o nga istruktura han school year nga mas pantay nga maidistribwer an mga panahon han pag istudyo ha bug-os nga tuig han eskwelahan samtang naghahatag oras para ha assessment ngan recovery.
Dugang pa han ahensya, an tulo ka termino ha kalendaryo in kanit ha mas hiluag nga pakete hin reporma nga gin kakalakipan han mga pagbabag-o ha assessment systems, mas pinasimple nga pagpaplano han mga lesson plan, sugad man an expanded learning recovery o Academic Recovery and Accessible Learning o ARAL program.
Igpapatuman an bag-o nga kalendaryo han eskwelahan ha bug-os nga nasud ha mga pampubliko nga eskwelahan tikang School Year 2026–2027.
Subay pa ha DepEd, puydi gamiton han mga mga pribado nga eskwelahan an three-term structure, pero angay la nga sundon gihapon hini an igin isa nga ihap han klase.
