TACLOBAN CITY – Usa nga kaso hin pamusil an nahipatik ha sulod han Cockpit Arena ha Sitio Lilang, Brgy. Poblacion, Merida Leyte.
Ginkilala an suspek kan Christopher Urbano, 36-anyos an pangidaron, ngan residente han Sitio Lilang, Brgy. Poblacion, Merida Leyte, samtang, ginkilala naman an biktima kan Jobert Quiñones, ada ha legal nga pangidaron, ngan residente ha Sitio Boga-boga, Brgy. Lamanoc, Merida, Leyte.
Sumala kan PMAJ. Ian Salvador Po, Chief of Police hiton Merida Municipal Police Station, personal nga delito an rason han pamusil han suspek ha biktima.
Basar ha gindumara nga imbestigasyon, ugsa daw mahitabo an pamusil in nagkamay-ada anay hin mapaso nga pagbatunay an biktima nga suspek kasumpay han mga rules ha sulod han bulangan. Mahuman naman daw an pagbatunay hine in boluntaryo nga nagbayad an suspek han iya violation ha organizer hiton bulangan. Pero ha paggawas han mga ine han bulangan in nagkamay-ada naliwat ine hin argumento kun diin nasuntok han biktima an suspek.
Dayun naman daw an mga ine nga gin awat han mga nakadto nga katawhan ngan gin yaknan an suspek nga umuli nala haira balay agud malikayan an dako han away. Lumakat naman daw an suspek pero bumalik ine ha sulod han arena ngan ginpusil an biktima gamit an waray pa kahisabti nga kalibre hin pusil.
Dayun daw gihapon nga umiskapo an suspek kahuman han insidente kun diin dayun gihapon nga nagdumara hin operasyon-pamiling han suspek an mga kapulisan.
Nag-angkon naman hin usa nga igo hin pusil ha dughan an biktima kun diin dayun ine nga gindara ha Ormoc City Hospital agud matagan hin atensyon-medical pero gin deklara ine nga dead-on-arrival hiton attending physician ine.
