TACLOBAN CITY – Dead on arrival an usa nga barangay kapitan mahuman nga pagbun-on ha Brgy. Julita, Biliran, Biliran.
Sumala kan PSSG Jerson Gervacio, Imbestigador han Biliran Municipal Police Station, ginkilala an mao nga biktima nga hi Roberto Yapan, kapitan han mao nga barangay samtang an suspek naman in ginkilala kan Ginie Balce, 36 anyos, construction worker ngan residente han mao gihapon nga barangay.
Basar ha inisyal nga imbestigasyo, may gintatawagan ha iya cellphone an mao nga biktima samtang nakadto ha ira terrace han tigda nala nga dumaop an suspek ngan ginpapanmumuno ini.
Nakag angkon hin binun-an ha liug ngan tagiliran an mao nga biktima nga kapitan nga naging rason han iya kamatayon.
Basar gihapon ha imbestigasyon han mga otoridad, may personal nga kasinahon an suspek ha mao nga biktima sugadman delito han mga ini parte han naglabay nga piniliay.
Ha pagkayana in padayon naman an imbestigasyon han mga otoridad bahin han motibo han suspek ha iya ginbuhat nga krimen.
Padayon gihapon nga ginhahalpat an nakaeskapo nga suspetsado.
