TACLOBAN CITY – Patay an usa nga kapitan ha Northern Samar mahuman nga pagpamumusilon ha sakob han panimalay hini han upat nga waray pa kakikilal-i nga mga armado nga kalalakin-an nga sakay hin duha nga motor.
Ginkilala an biktima nga hi Carmelito Baluyot, 51 anyos an pangidaron, ngan kapitan han interior nga Brgy. Rumbang, Lao-ang Northern Samar.
Sumala kan Pol. Lt. Nelson Lapeseros han Chief of Police han Lao-ang MPS, subay ha inisyal nga imbestigasyon, nakada ha sakob han ira tindahan an mao nga biktima ngan samtang nagtatakos ini hin bugas para han iya customer nga napalit in tigda nga may inmulpot nga upat nga armado nga mga suspek ngan tigda nga ginpanmumusil ini.
Nag-angkon hin damo nga igo ha lawas ngan ulo an mao nga kapitan nga nagresulta ha dayon nga kamatayon hini.
Ha pagkayana in ginhihingita han mga kapulisan an tanan nga anggulo, kun mayda ba nakarawat nga hulga ha iya kinabuhi an mao nga kapitan san-o mahitabo an insidente o ini ba in may kalabutan ha pulitika.
Nahibaruan nga an mao nga biktima an ikaduha nga insidente hin kapitan nga ginpanmumusil-patay yana nga bulan kun diin pinakasyahan hini an kapitan ha Hilongos, Leyte.
