Tutugutan ni Senate Finance Committee Chairperson JV Ejercito an pagtambong han mga representante han civil society organizations (CSOs) komo mga watcher ha deliberasyon han panukala nga P7.2 trilyon nga nasyonal budget ha bicameral conference committee.
Kasunod ini han gindumara nga hearing han Senate Finance Committee dida han Oktubre 26, kaupod an mga CSO kun diin nagpahimatngon an People’s Budget Coalition (PBC) may kalabotan ha sobra P1 trilyon nga kantidad han mga gin-aaelgar alokaasyon o red flags ha panukala nga budget. Lakip dinhi an magkadurudilain nga klase hin pondo nga gintatawag nga “pork” ha bersyon han General Appropriations Bill (GAB) han Kamara.
Gindepensahan naman han mga lider han House of Representatives an mga pagbabag-o ira ginhimo ha panukala nga badyet, ngan ginpahayag nga subay an mga ini ha mga panukala han mga ahensya ngan may igo nga batayan.
Ha luyo hini, gin-aghat ni Ejercito an publiko nga gamiton an mga digital tool nga ginhimo han mga CSO agud usisaon an mga dokumento han badyet ngan matudlok an mga kuwestiyonable nga alokasyon.
