Abri ha posible nga diplimatiko nga pag-iistorya an Iranian President nga hi Masoud Pezeshkian sa Estados Unidos kasumpay ha gintawag hini nga “path of confrontation is more costly and futile than ever before.”
Ginbuhat han opisyal an pahayag pira kaoras ugsa maghatag hin pahayag hi US President Donald Trump kasumpay ha sitwasyon han kasamok ha Iran, nga gintawag hini nga “important update.”
Syahan na nga ginpahayag ni Trump, nga daw naghangyo an Iran hin ceasefire nga dayun naman igindiwara ni Iran’s Ministry of Foreign Affairs Spokesman, Esmaeil Baghaei.
Ha surat nga ginpagawas han Iran nga mayda sobra mil nga pulong, ginhingadayan ni Pezeshkian an kasaysayan han Iran ha pag-atubang ha mga pananakop ngan kasamok, ngan iginduon nga waray bisan san-o magtikang hin kasamok an Iran.
Gintagan-duon gihapon hini an importansya han pag-iistorya han duha nga nasud nga mayda dakop nga epekto ha masunod nga henerasyon.
Gin klaro gihapon ni Pezeshkian, nga waray hira maraot nga buot ha iba nga mga nasud kaupod an Amerika, Europa, o mga kahigrani nga nasud.
Ha yana dire pa klaro kun gindadara han surat an bug-os nga gobyerno han Iran, mahitungod nga an Supreme Leader han nasud an mayda katapusan nga desisyon ha pangunahon nga istoryhaon kaupod an negosasyon ha Washington.
Dumako gihapon an impluwensya han Islamic Revolutionary Guards Corps ha mga desisyon ha kasamok.
Kasumpay hini, andam na daw makig-istorya ha Supreme Leader ngan ha Islamic Revolutionary Guards Corps hi Pezeshkian, kasumpay ha pagigin abri han Iran nga undangan an kasamok kun masisigurado an permanente nga kahimyang.
Depensa gihapon ni Pezeshkian , an mga retaliatory strikes han Iran kontra ha Israel ngan iba pa nga nasud ha Persian Gulf in kumo baton la ha ginbuhat ha ira, sugadman waray hini paghingadayi an pag-aabri han Strait of Hormuz nga nagdurot hin kasamok mahuman nga balabgan han Iran.
