INTERNATIONAL – Magdudumara hin state funeral an gobyerno han Iran para ha mga military commander hini ngan ha mga top scientist, nga namatay ha 12 ka-adlaw nga giyera ha butnga han ira nasud ngan Israel.
Subay han mga otoridad, nakatalaan ini pagdumara-on ha Sabado Hunyo 28, 2025.
Manunumduman nga nagtikang an airstrike ha butnga han duha nga nasod han Hunyo 13, kun diin ha siyahan nga adlaw han giyera in dayon nga namatay an lider han Revolutionary Guards nga hi Hossein Salami.
Nagkaada pa ini hin mga sagunsun nga balyu-ay hin missile attack nga nagresulta liwat han kamatayon han pira pa nga military commanders han Iran, lakip na an waray matudlok nga ihap han mga scientists.
Pira ha ira in nagtratrabaho ha mga nuclear site, uranium enrichment site, ngan ballistic missile program han nasabi nga nasod.
Basar ha pinaka-urhi nga report nga iginpagawas han Health Minister han Iran, sumaka na ha 610 nga sibilyan an namatay ha mao nga giyera, samtang sobra 4,200 ka-tawo naman an samaran ngan padayon nga gintatambal ha mga ospital.
Samtang, ha datos naman han Israel, aada ha 28 ka-tawo an namatay ha pag-atake ngan pagbulos han Iran.
